News34 chandrapur
चंद्रपूर - खंडणी प्रकरणात चर्चेत आलेल्या शिवसेना महिला जिल्हा संघटिका उज्वला नलगे यांना पदावरून पायउतार व्हावे लागले होते, मात्र 2 दिवसांनी त्यांची फेरनियुक्ती करण्यात आली. Shivsena thackeray group
काही दिवसांपूर्वी नागाळा येथील कोल डेपोमुळे परिसतील शेतपिकांचे मोठे नुकसान होत असल्याबाबत काही शेतकऱ्यांनी सौ. नलगे यांच्याकडे तक्रार केली होती. या तक्रारीची दखल घेत सौ. नलगे यांनी आपल्या काही कार्यकर्त्यांना कोल डेपोवर जाऊन माहिती घेण्यास सांगितले. तिथे जाऊन बघितले असता या डेपोमुळे शेतकऱ्यांच्या पिकांचे मोठे नुकसान व मोठ्या प्रमाणात प्रदूषण होत असल्याचे आढळून आले. याबाबत उज्वला नलगे यांनी घुग्गुस ठाणेदार यांना निवेदन दिले होते व अवैध कोल डेपो विरोधात आंदोलन करण्याचा इशारा दिला होता. यामुळे धास्तावलेल्या कोल डेपो मालक श्री. अमित अनेजा यांनी नलगे यांच्या घरी जाऊन मी तुम्हाला पन्नास हजार रुपये देतो पण आंदोलन करू नका, अशी ऑफर दिली. पण महिला, कामगार, शेतकरी यांच्या हक्कासाठी लढणाऱ्या सौ. नलगे यांनी आजवर कधी तडजोड केली नाही आणि कधी करणार नाही, म्हणून ही ऑफर धूडकावून लावली. श्री. अनेजा यांनी या संभाषणाची ध्वनिफीत बनवून पोलीस अधीक्षकांकडे तक्रार दाखल केली व गुन्हे दाखल करण्यात आले. यादरम्यान सौ. नलगे यांची प्रकृती ठीक नसल्याने त्या रुग्णालयात भरती होत्या. यामुळे त्यांना याचा खुलासा करण्यास विलंब झाला. हीच संधी साधून काही विरोधकांनी त्यांच्या एकतर्फी तक्रारी वरिष्ठांकडे केल्या. त्याच आधारे पक्षातून त्यांची हकालपट्टी करण्यात आल्याची बातमी प्रकाशित झाली व ती सर्वत्र व्हायरल करण्यात आली. पण "रडायचं नाही लढायचं" या बाळासाहेबांच्या विचारांवर चालणाऱ्या रणरागिनी सौ. उज्वला नलगे यांनी थेट मुंबई गाठली. या खोट्या तक्रारीबाबत खुलासा व आपल्या आजवरच्या कार्याचा आढावा त्यांनी वरिष्ठांकडे सादर केला. वरिष्ठांनी याची पडताळणी करून शिवसेना पक्षप्रमुख उद्धव ठाकरे साहेब यांच्या आदेशाने सौ. उज्वला प्रमोद नलगे यांची जिल्हा संघटकपदी पुनश्च नियुक्ती केली. याबाबतचे वृत्त सामना दैनिकातून प्रकाशित करण्यात आले. सौ. नलगे यांच्या पुनश्चनियुक्तीने महिला आघाडीत नवचैतन्य निर्माण झाले आहे. पुन्हा जोमाने पक्ष संघटन मजबूत करून नव्या क्रांतीची धगधगती "मशाल" जिल्ह्यात तळागाळात पोहोचविणार असल्याचा संकल्प सौ. उज्वला नलगे यांनी केला आहे. Chandrapur coal depo
नलगे यांच्या फेरनियुक्तीवर काय म्हणाले खंडणी प्रकरणातील फिर्यादी अमित अनेजा?
श्रीमती उज्वला नलगे यांच्या फेरनियुक्ती चे आम्ही मनःपूर्वक स्वागत करतो, शिवसेनेच्या वरिष्ठ पदाधिकाऱ्यांनी आपल्या विवेक बुद्धीचा वापर करीत त्यांची जिल्हा संघटिका पदावर पुनश्च नियुक्ती करीत त्यांना जबाबदारी दिली, यावर मी आपली प्रतिक्रिया देणार नाही.
नलगे आणि त्यांचे कार्यकर्ते खंडणी प्रकरणात आरोपी असून सर्व जामिनावर बाहेर आहे हे त्यांनी विसरू नये.
पैसे मागतानाचा व्हिडीओ व ऑडिओ क्लिप पोलिसांजवळ आहे. आम्हाला न्यायालयावर पूर्ण विश्वास आहे, खंडणी प्रकरणात श्रीमती नलगे व त्यांच्या कार्यकर्त्याना शिक्षा होणारचं.
स्वतःच्या बचावात त्यांना जे काही म्हणायचं ते त्यांचा अधिकार आहे.
माझा कोल डेपो अवैध आहे हे त्यांनी सिद्ध करावं यासाठी मी त्यांना आव्हान करीत त्यांच्यावर 50 लाख रुपयांचा मानहानी दावा दाखल केला असून त्यांनी त्या नोटिसवर उत्तर द्यावे.