चिमूर - तालुक्यातील शेवटच्या टोकावर असणाऱ्या काजळसर-मोटेगाव बीट अंतर्गत कार्यरत असणारे वनपाल श्रीकृष्ण नागरे यांचेवर कर्तव्यात कुचराई केल्याचा ठपका ठेवत त्यांची तडकाफडकी बदली करून विभागीय चौकशी करण्याचे निवेदन सामाजिक युवा ब्रिगेडच्या वतीने मुख्य वनसंरक्षक, चंद्रपूर यांना दिले आहे.
तळोधी वनपरिक्षेत्र अंतर्गत येणाऱ्या नागभीड व सिंदेवाही तालुक्यालगत चिमूर तालुक्याच्या शेवटच्या टोकावर असलेल्या काजळसर-मोटेगाव बीटात गेल्या 3 वर्षापासून श्रीकृष्ण नागरे हे वनरक्षक म्हणून कार्यरत आहेत.
परंतु त्यांची गावातील लोकांसोबत वर्तवणूक चांगली नसल्यामुळे लोकांसोबत उद्धट भाषेने बोलणे, शिवीगाळ करणे, त्यांच्या नोकरीच्या कामात हलगर्जीपणा आढळून येत असल्यामुळे तसेच संबंधित अधिकाऱ्यांच्या बीटात
प्रचंड प्रमाणात अवैद्य वृक्षतोड, व गौणखनिज उत्खनन झालेले आहे. शेत शिवारात वन्यप्राण्यांकडून झालेल्या नुकसानाची भरपाई मिळण्याकरता आर्थिक देवाण-घेवाण करणे,
मर्जीतल्या लोकांशी हितसंबंध साधून आर्थिक देवाण-घेवाण करून त्यांना वहिवाटीसाठी वन अधिकारातल्या बीटातील जमिनी प्रदान करणे,
अशा अनेक कारणांमुळे गाववासीय जनता त्रस्त झाली आहे. त्यामुळे गावकऱ्यांकडून वनरक्षक नागरे यांचा निषेध व्यक्त करण्यात आलेला असल्याचे निवेदनातून व्यक्त केले आहे.
मोठेगाव हे चिमूर तालुक्यातील शेवटच्या टोकावरील गाव आहे. नागरे वनरक्षक हे जेव्हापासून काजळसर-मोटेगाव येथे नोकरीवर रुजू झाले तेव्हापासून त्यांची वागणूक गावकरी यांच्या विरोधात्मक आढळून आलेली आहे.
त्यामुळे समस्त गावकऱ्यांच्या मागणीवरून सामाजिक युवा ब्रिगेड संघटनेला निवेदन देऊन मागणी द्वारा नागरेच्या बदलीसाठी मदत करावी असे अर्ज आल्याने सामाजिक युवा ब्रिगेड संघटनेने तात्काळ दखल घेत दिनांक 21/08/2021 शनिवारला सामाजिक युवा ब्रिगेड संघटनेचे अध्यक्ष अमोल निनावे, सामाजिक कार्यकर्ते अजित सुकारे व अन्य सदस्यांच्या उपस्थित मुख्य वनसंरक्षक चंद्रपूर वनवृत्त एन. आर. प्रवीण यांच्याकडे निवेदन देऊन नागरे वनरक्षक यांची तात्काळ बदली करण्यात यावी तसेच विभागीय चौकशी लावून त्यांना बडतर्फ करण्यात यावे अशी मागणी केली.
येणाऱ्या आठ दिवसात विभागीय चौकशी अथवा बदली न झाल्यास धरणे आंदोलन व आमरण उपोषण करण्याचा इशारा सुद्धा सामाजिक युवा ब्रीगेड संघटनेच्या वतीने देण्यात आलेला आहे.*