कोरपना ता.प्र.सै.मूम्ताज़ अली:-
गडचांदूर नगरपरिषदेच्या नगराध्यक्षांनी २० जुलै मंगळवार रोजी दुपारी १,३० वाजता "विशेष सभा समिती" ची सभा घेण्याचे ठरवले आहे.विषयसुची मधील कामकाज चालवण्यासाठी सदर सभा बोलाविण्यात आली असून यासंबंधीची माहिती पत्राद्वारे सर्व नगरसेवकांना देण्यात आली आहे.यात काही विषयांवर विचारविनिमय करून निर्णय घेण्यात येणार असल्याचे कळते.मात्र सदर सभा नियमबाह्य असल्याचे म्हणत विरोधी पक्ष नगरसेवक अरविंद डोहे यांनी सभा रद्द करण्यात यावी अशी विनंती मुख्याधिकारी व नगराध्यक्षांना दिलेल्या निवेदनाद्वारे केली आहे.
नगराध्यक्षांनी विशेष सभा बोलावली खरी परंतु नियमानुसार विषेश सभा ही नगरपरिषदेच्या १/४ सदस्यांनी अर्ज दिला असल्यास लावता येते.परंतु सदरची सभा लावण्यासाठी माझ्या माहितीनुसार अद्यापही कोणत्याही नगरपरिषद सदस्यांनी विनंती अर्ज केलेला नाही.असे असताना नगराध्यक्ष महोदयांना कुठलाही अधिकार नसताना सदरची सभा स्वतःच्या अधिकाराने लावलेली ती नियमबाह्य,बेकायदेशीर आहे.असे मजकूर नगरसेवक डोहे यांनी निवेदनात नमूद करून सदरची सभा रद्द करण्याची विनंती केली आहे. सदरची सभा नियमबाह्य असल्याचे आरोप नगरसेवक डोहे यांनी केले खरे पण ही सभा नियमानुसार की नियमबाह्य हे चित्र आता २० तारखेलाच स्पष्ट होतील हे मात्र तेवढेच खरे.
