कोरपना ता.प्र.सै.मूम्ताज़ अली:-
कोरपना तालुक्यातील सर्वात मोठे, औद्योगिक व नावाजलेल्या गडचांदूर शहरातील नगरपरिषद सध्या नाना कारणाने सर्वत्र चर्चेचा विषय बनली आहे.याठिकाणी सुरू असलेले कारभार नागरिकांना अक्षरशः डोकेदुखी ठरत असून अखेर यांचं नेमकं चाललय तरी काय ! हे कळायला मार्गच उरलेला नाही.विविध माध्यमातून शहरवासी नगरपरिषदेच्या नावाने शिमगा घालत असून "नगरपरिषदेकडे प्लॅनिंगच नाही,पैसा आहे,खर्च करणे एवढेच प्लॅनिंग आहे" अशाप्रकारे सत्ताधाऱ्यांना घरचा अहेर दिला जात आहे. यांच्याबाबतीत बोलायचे झाले तर "काही अपवाद वगळता लोकांची समस्या धुऱ्यावर,कारभारी माऱ्यावर" अशा उपहासात्मक टीकांसह याठिकाणी एकदोन विरोधी नगरसेवक आपली भुमिका सक्षमपणे वठवतांना दिसतात.बाकीचे विरोधी की सत्ताधारी ! हेच समजत नाही" अशी जळजळीत भावना नागरिकांकडून व्यक्त होताना दिसत आहे.असे असताना नुकतीच विशेष सभा बोलावून इतर विषयांसह नवीन दारू दुकानाला नागरिकांचा विरोध झुगारून देण्यात आलेला ना-हरकतचा विषय सध्या कमालीचा गाजत आहे.
ज्याठिकाणी नवीन दारू दुकान सुरू होणार आहे त्या मार्गावर अवघ्या काहीच अंतरावर "क्रांतीवीर शहीद बाबुराव शेडमाके" चौक आहे. आणि मागील वर्षी १५ आक्टोंबर २०२० रोजी आयोजित सर्वसाधारण सभेच्या विषय सुचितील विषय क्रं.४ हा सदर चौकाचे सौंदर्यीकरण व सुशोभीकरणाचा होता.त्यावेळी हा विषय सर्वानुमते मंजूर सुद्धा करण्यात आला. अशी माहिती असून अद्यापही कामाला सुरुवात झालेली नाही.असे असताना आता हाच विषय आगामी ३० जुलैला आयोजित सर्वसाधारण सभेत मंजुरीसाठी ठेवण्यात येणार आहे.एकाच विषयाला दोनदा मंजूरी कशासाठी ? असा प्रश्न निर्माण होत असून गाजत असलेल्या देशी दारू दुकानाच्या विषयावर पडदा टाकण्यासाठी शहीद बाबुराव शेडमाके चौकात सौंदर्यीकरण व सुशोभीकरणाचा विषय पुन्हा घेवुन प्रभाग क्र.५ च्या रहिवासीयांची दिशाभूल करण्याचा तसेच एका विशिष्ट समाज बांधवांच्या जखमी भावनांवर फुंकर घालण्याचा व सहानुभूती घेण्याचा प्रयत्न नगराध्यक्षांकडून केला जात असल्याचा थेट आरोप विरोधी पक्ष नगरसेवक अरविंद डोहे यांनी केला आहे.सदर आरोपांविषयी प्रतिक्रिया जाणून घेण्यासाठी नगराध्यक्षांना दूरध्वनीवरून संपर्क केला असता संपर्क झाला नाही.
------------//--------
सदर चौकात सौंदर्यीकरणाचा ठराव सर्वानुमते मागील काही महिन्यापूर्वीच घेण्यात आला होता.परंतू त्याची जाणीवपूर्वक कुठलीही अंमलबजावणी यांनी केलेली नाही.मात्र येणार्‍या देशी दारू दुकानाला ना-हरकत देण्यासाठी विशेष सभा घेण्यात आली.यामुळे त्या परिसरातील नागरिकांनी याचा विरोध केला आणि करत आहे.त्यांना शांत करण्याच्या हेतुने मंजुरी प्राप्त ठरावाला पुन्हा ३० जुलैला सर्वसाधारण सभेत ठेवला जाणार आहे.क्रांतीवीर शहीद बाबुराव शेडमाके चौकाचे सौंदर्यीकरणाचा विषय,हा केवळ जनतेची दिशाभूल करणारा असून दारूच्या विषयावर पडदा टाकण्याचा केविलवाना प्रयत्न नगराध्यक्षा करीत आहे.
(अरविंद डोहे,विरोधी नगरसेवक न.प. गडचांदूर)
----------//---------