कोरपना - कोरपना तालुक्यातील आसन खुर्द येथे आज शनिवार ला सकाळी आपल्या वडिलांचे घर जाळून स्वतः विष घेतल्याची घटना घडली. रामा मारोती पेंदोर (30) रा. इंजापूर याने वडील मारोती पेंदोर यांच्याशी इंजापूर येथे भांडण केले. तुम्हाला जीवे मारतो म्हणून कुऱ्हाड घेऊन फिरत होता. दरम्यान, आसन खुर्द येथे येऊन वडिलाचे घर पेटविले. यात सर्व वस्तू भस्मसात झाल्या. गावापासून दूर असल्यामुळे आग पसरली नाही. अग्निशमन वाहनाने पोहचून आग विझविली. प्राप्त तक्रारीवरून गडचांदूरचे ठाणेदार गोपाल भारती यांच्या मार्गदर्शनात गडचांदूर पोलिसांनी घटनास्थळी भेट दिली. त्यावेळी आरोपी कुऱ्हाड हाती घेऊन होता. त्याने उंदीर मारायचे केक खाल्याचे दिसून आले. दुपारी 2 वाजता पोलिसांनी त्याला उपचारासाठी गडचांदूर येथे नेले. आरोपी रामाच्या भीतीने आईवडील इंजापूर गाव सोडून आसन खुर्द येथे मागील दोन वर्षे मोलमजुरी करून उदरनिर्वाह करित होते. तरीही तो मारहाण करित असल्याचे वडिलांनी सांगितले.